chushtash

مەن ئەسلى خېلى بۇرۇنلا ئۆزۈمنىڭ TOEFLۋەGREغا تەييارلىق قىلىش تەجىرىبىلىرىمنى يېزىپ، تورداشلار بىلەن ئورتاققىلىش، شۇ ئارقىلىق بۇ ئىمتاھانلارنى بېرىشنى پىلانلاۋاتقان، چەتئەلدە ئوقۇشنى ئارزۇ قىلىۋاتقان بىر قىسىم قېرىنداشلىرىمىزغا ئاز-تولا بولسىمۇ ياردەم قىلىشنى ئويلاپ كېلىۋاتقان ئىدىم. بىراق، "سۈيى بار يەرنىڭ ئوتى يوق" دېگەندەك، ۋاقتىم مېنىڭ بۇ پىلانلىرىمنى ئورۇنلاشقا ئەسلا يول قويمىدى. خۇداغا شۈكرى، ئەمدىلىكتە بولسىمۇ سەل ئۆزۈمنى توختىتىۋېلىپ، ئۇشبۇ خەتلەرنى يېزىشقا مۇناسىپ بولۇپتىمەن. مەن يېقىنقى ۋاقىت ئىچىدە بۇ تېمامدىن سىرت، يەنە GREغا تەييارلىق قىلىش، چەتئەلدە پراكتىكا قىلىش، ئامىرىكىدىكى مەكتەپلەرنى ئىلتىماس قىلىش تەرتىپى، ئامىرىكىدىكى پىرففىسورلار بىلەن ئالدىن ئالاقىلىشىش، Personal Statement يېزىش ئۇسۇلى ۋە دىققەت قىلىشقا تىگىشلىك ئىشلار، Resumeيېزىش ئۇسۇلى قاتارلىق بىر قانچە تېمىلاردا ئۆز تەجرىبەمنى ۋە بۇ تېمىلار توغرىلىق ئويلىغان شەخسىي كۆزقارىشىمنى ئامال بار تەپسىلىي يېزىپ چىقىپ، مۇشۇ يۆنىلىشلەردە ئىلگىرلەش ئۈچۈن ئىزدىنىۋاتقان ئۇيغۇر قېرىنداشلىرىم بىلەن ئورتاقلىشىشقا تىرىشىمەن. ئەگەر سىزنىڭ مەن يازغان تېمىلار ئۈستىدە ھەرقانداق ئوي-پىكىر ۋە كۆزقاراشلىرىڭىز بولسا، ماڭا ئېلخەت ياكى توردا قىسقا ئۇچۇر يوللاپ يۈرمەي، شۇ تېمىلار ئاستىغا ئىنكاس يازسىڭىز، مەن چوقۇم كۆرۈمەن ۋە سىزگە جاۋاپ قايتۇرۇمەن. بۇ جەرياندا باشقا تورداشلارمۇ سىز سورىغان سوئاللاردىن ۋە جاۋابىدىن بەلگىلىك مەنپەئەت ئېلىشى مۇمكىن.
-------------------------------------
مەن ئالىي مەكتەپكە كېلىشتىن بۇرۇنلا خۇددى باشقا نۇرغۇن دوستلاردەك چەتئەلگە چىقىپ ئوقۇشنى ئۆزۈمنىڭ بىر ئاللا خالىسا چوقۇم ئەمەلگە ئاشۇرىدىغان نىشانىم قىلغان ئىدىم. بىراق ئۇ ۋاقىتلاردا تېخى قانداق قىلسام ئاندىن بۇ نىشاننى ئەمەلگە ئاشۇرۇش مەن ئۈچۈن بىر نامەلۇم سان ئىدى. مېنىڭ بىلىدىغىنىم بولسا، مەن بىر ئىنگلىزچە ئىشلىتىدىغان دۆلەتكە چىقىپ ئوقۇشۇم، بۇنىڭ ئۈچۈن ئىنگلىز تىلىنى پۇختا بىلىشىم كېرەك ئىدى. سەبىي تەسەۋۋۇرغا تايىنىپ، شۇنداق قىلساملا ئاندىن كەلگۈسىدە ئامىرىكا دېگەندەك دۆلەتتە ئوقۇيالايدىغانلىقىمغىمۇ ئىشىنىپ كەلدىم. بىراق، ئاللاغا شۈكرى، مەن تۇغما خارەكتىر جەھەتتىن تەسەۋۋۇرلا بولۇپ، ئەمىلي ھەركىتى يوق كىشىلەردىن ئەمەس ئىدىم. شۇ سەۋەپ بۇ پلانىمغا يېتىش ئۈچۈن قىلىشقا تىگىشلىك مەن بىلىدىغان ئىشلارنى رەتكە تىزىپ چىقتىم، ھەمدە بۇلارنىڭ ئەڭ ئالدىغا ئىنگلىزتىلىنى پۇختا ئۆگۈنۈپ چىقىشنى قويدۇم. مەن ئالىي مەكتەپكە كىرىش جەريانىدا ئۆزۈمگە مۇنداق بەش تۈرلۈك شەرتنى قويغان:
A. ئىنگلىزتىلىنى پۇختا ئىگىلەپ، ئالىي مەكتەپ 3-يىللىقنى پۈتتۈرگىچە چەتئەلدىكى مەكتەپلەرنىڭ تەلىپىگە يېتىپ بولۇش.
B. جېنىمنى تىكىپ قويۇپ ئۆز كەسپىي دەرسلىرىمنى ياخشى ۋە پۇختا ئىگىلەش.
C. يەنە بىر چەتئەل تىلى، بەلكىم فرانسوزچە ياكى ئەرەپچە، ئۆگۈنۈپ، ئوقۇش پۈتتۈرگەندە تۆت تىللىق بولۇش.
D. ئۇيۇنخور ئۇيغۇر بالىلىرىغا ئارلاشماسلىق، ئۇلارنىڭ غەيۋەتلىرىگە پىسەنت قىلماسلىق.
E. تەن سالامەتلىكنى ياخشى ئاسراش.
مەن مۇشۇ پىلانىم بويىچە ئۆز ئالىي مەكتەپ ھاياتىمنى باشلىدىم. ئۇيغۇر دىيارىدىن ئايرىلىپ، مەن ئۈچۈن پۈتۈنلەي ئارتۇقچە ھېساپلانغان بىر يىللىق "تەييارلىق" ئوقۇشىنى ئىچكىرىدىكى بىر شەھەردە ئوقۇدۇم. باشقىلارنىڭ نەزىرىدە ئۇلارنى ياخشى ئوقۇغۇچىلاردىن ئۇيۇنقېپى بالىلارغا ئايلاندۇرىۋەتكەن بىريىل "تەييارلىق" ئوقۇشىدا، مەن ئىنگلىزتىلىدا ئالى مەكتەپ ئوقۇغۇچىلىرىنىڭ 4-دەرىجە ئىمتاھانىدىن مۇۋاپپىقىيەتلىك ھالدا ئۆتتۈم.
"تەييارلىق" يىلى ئاياقلاشقاندىن كىيىن، مەن ئۆزۈمنىڭ ھەقىقي ئۇنۋېرسىتىغا كەلگەن ئىدىم. بۇيەردىمۇ يەنىلا ئۆزۈمگە قويغان نىشاننى ئىشقا ئاشۇرۇش ئۈچۈن تىرىشىشنى داۋاملاشتۇردۇم. ئۇيغۇر دىيارىدا تولۇق ئوتتۇرىنى پۈتتۈرگىچە ئوقۇپ، بىر يىل ئىچكىرىدىكى ئوتتۇرھال دەرىجىدىكى بىر شەھەردە "تەييارلىق" ئوقۇپ، ئاندىن جۇڭگونىڭ ئەڭ تەررەققىي تاپقان چوڭ شەھىرىگە كەلگەن مەندەك بىر ياش ئۈچۈن، بۇ يەردىكى ھاياتنىڭ باشلىنىىش باسقۇچىدا مېنى جەلىپ قىلىدىغان يېىڭىلىقلار ھەقىقەتەنمۇ كۆپ ئىدى. بىراق مەن ئۆزۈمنى تۇتۇۋېلىپ. ئامال بار ۋاقتىمنى ئوقۇشقا مەركەزلەشتۈرۈشكە تىرىشاتتىم. ئەلۋەتتە، مەن قانداقتۇر ئوقۇش ئۈچۈن باشقا كۆڭۈل ئېچىش پائالىيەتلىرىدىن ۋاز كېچىىدىغان ئۇنچىۋالا ئالىيجاناپ ئەمەسمەن. مېنىڭ كىچىكىمدىن ئوقۇش ۋە ئۇيۇنغا تۇتقان پوزىتسىيەرىم ئىنتايىن ئېنىق بولۇپ، "ئۆگۈنۈش قىلغاندا ئۇيۇننى ئويلىماسلىق، ئوينىغاندا ئۆگۈنۈشنى ئويلىماسلىق" دېگەندىن ئىبارەت ئىدى. شۇڭا مەن بەلگىلىك ۋاقىت چىقىرىپ، بۇ چوڭ شەھەر مۇھىتىدىن قانغۇچە زوق ئېلىشقىمۇ ئۈلگۈردۈم. لېكىن، باشقىلاغا قارىغاندا ئاز "ئويناپ"، كۆپ ئوقۇغان بولدۇم. ئويلاپ باقسام، پۈتكۈل ئاليى مەكتەپ جەريانىدا مەن ئەڭ كۆپ ۋاقىت سەرپ قىلغان ساھە -- ئىنگلىزتىلى ئۆگۈنۈش بولۇپتۇ. مەن بۇ يەرگە 4-دەرىجە ئىمتاھانىدىن ئۆتكەن ھالەتتە كەلگەن بولۇپ، تولۇق كۇرسنىڭ 1-يىللىق 1- مەۋسۈمىدە مەن 6-دەرىجە ئىمتاھانى بېرىدىغانغا تىزىملاتتىم. يىڭى كەلگەن بالىلارنىڭ 6-دەرىجىگە تىزىملاتماقچى بولۇشى بۇ مەكتەپ تارىخدا تۇنجى قېتىملىقىكەن. مەكتەپتىن ئوڭۇشلۇق تىزىملىتىپ، ئەمدى ئىمتاھاننى راۋرۇس بېرەي دەپ يۈرگەن كۈنلەرنىڭ بىرىدە مەن مەكتەپ تۇرۇشلۇق يەرلىك مائارىپ نازارىتى قىلغان تېلفوننى قۇبۇل قىلدىم. تېلفوندا دېيىلىشىچە، ئۇلار ئىلگىرى ئالىي مەكتەپ 1-يىللىقىدا ئوقۇيدىغانلارنى 6-دەرىجە ئىمتاھانىغا تىزىملىتىدىغان ئىشقا يولۇقماپتىكەنمىش، ئۆتەلمەي قېلىپ ئۆتۈش نىسپىتىگە تەسىر يەتكۈزۈشۈمنى كۆزدە تۇتۇپ، مېنىڭ تىزىملاتقان ئۇچۇرۇمنى مەكتەپكە قايتۇرۋېتىپتۇ، دېمەك مەن ئىمتاھان بەرسەم بولمايدىكەن!
دەسلەپ "ھە، ئەھۋال مۇشۇنداق بولسا، بولۇپتۇ ئەمسە" دەپ يۈردۈم، بىراق ئاز ۋاقىت ئۆتكەندىن كىيىن مەكتىپىمدىكى مەن بىلەن ئوخشاش 1-يىللىقتا ئوقۇيدىغان بىر مۇشۇ شەھەرلىك قىزنىڭ 6-دەرىجىگە تىزىملاتقانلىقىدىن خەۋەردار بولدۇم. بۇ ئىشلاردىن ئازدۇر-كۆپتۇر خەۋىرى بار بىرسى ماڭا غورورۇمنى ئۇرغۇتىدىغان بىر سەۋەپنىڭ بارلىقىنى ئېيتتى. شۇ ئاچچىقىمدا مەن "خەپ، قاراپ تۇرۇش" دېگىنىمچە، ئىنگلىزتىلىنى تېخىمۇ تىرىشىپ ئۆگۈنۈشكە كىرىشتىم. كۈندە ئاز دېگەندىمۇ 60تىن ئارتۇق سۆزلۈك يادىلاشنى ئىزچىل داۋاملاشتۇردۇم. شۇنداق قىلىپ ئاز ۋاقىت ئىچىدىلا قولۇمدىكى "6-دەرىجە سۆزلۈك كىتابى"دىكى سۆزلۈكلەرنى يادىلاپ بولدۇم.
ئۇندىن سىرت باشقا ئاڭلاش، يېزىقچىلىق قاتارلىق ئىقتىدارىمنى مەشىق قىلدۇرۇشقىمۇ راۋرۇس كۈچۈدۈم، ۋە ئىككىنجى يىلى تۇنجى قېتىم 6-دەرىجىگە قاتنىشىپ، يۇقۇرى نومۇر بىلەن ئۆتتۈم.
شۇندىن كىيىن مەن TOEFLئىمتاھانىغا تەييارلىق قىلىشقا كىرىشتىم. 2005-يىلىدىن باشلاپ، TOEFL iBTيولغا قويۇلۇپتۇ. بۇ پۈتۈنلەي كومپيۇتىردا بېرىدىغان ئىمتاھان شەكلى بولۇپ، ئىمتاھان ۋاقتى ئادەتتە 4سائەتتىن ئاشىدۇ. ئىمتاھان ئوقۇش، ئاڭلاش، سۆزلەش ۋە ماقالە يېزىشتىن ئىبارەت تۆت بۆلەكتىن تەركىب تاپقان بولىدۇ. بۇ ئىمتاھان شەكلى ۋە ئۇسۇلى جەھەتتە مەن بۇيەردە ئارتۇق سۆزلەشنى مۇۋاپىق كۆرمىدىم. تورداشلار توردىن بۇ ئۇچۇرلانى تولۇق تاپالايدۇ، ئەگەر ئۇيغۇرچە ئۇچۇرغا ئېھتىياجلىق بولۇپ، تاپالمىسا، مۇشۇ تېمىغا ئىنكاس شەكلىدە يازسا بولىدۇ. مەن ئاساسلىق قىلىپ ئۆزۈمنىڭ ئۆگۈنۈش ئۇسۇلۇمنى سۆزلەپ ئۆتەي:
1. ئەڭ ئاۋۋال ئۆزۈمنىڭ ئىمتاھانغا بولغان پوزىتسىيەرىمنى تۈزەتتىم. مەن بۇ ئىمتاھاننى نىمە ئۈچۈن بېرىمەن؟ چۈنكى مەن چەتئەلگە چىقىپ ئوقۇماقچى. ئۇنداقتا ئەگەر چەتئەلگە چىقالماي قالسامچۇ؟ ھىچقىسى يوق، ئۇنداقتا مەن ھىچ بولمىغاندا ئۆزۈپ شۇنچە تىرىشىپ ئۆگەنگەن ئىنگلىزتىلىمنىڭ قايسى سەۋىيەدە ئىكەنلىكىنى بىلىۋالىمەن. بۇمۇ مەن ئۈچۈن بىر خىل مۇۋەپپىقىيەت. مەن پەقەت پۈتۈن كۈچۈم بىلەن تىرىشىمەن، بىراق نەتىجىسىنىڭ قانداق بولىشىنى بەلگىلەش بىز ئىنسانلارنىڭ قولىدىن كېلىدىغان ئىش ئەمەس. ئۇنداقتاTOEFLقورقۇنچلۇقمۇ؟ ياق! بىز ئۇيغۇرلاردا "قىيىن ئىش يوق ئالەمدە، كۆڭۈل قويغان ئادەمدە" دەيدىغان گەپ بار. گەپ مېنىڭ كۆڭۈل قويۇش-قويماسلىقىم ۋە توغرا ئۇسۇل قوللىنىش-قوللانماسلىقىمدا.
2. ئاندىن ئەمەلىي تەييارلىقنى سۆزلۈك قىسمىدىن باشلىدىم. تۇنجى قېتىم مەن TOEFLسۆزلۈك كىتابىنى كۆرۈپ، "بۇنچىۋالا چوڭ كىتاپنى قاچانمۇ تۈگۈتۈپ بولارمەن" دەپ ئويلىدىم. شۇنىڭ بىلەن ئۆزۈمگە بېسىم ھېس قىلدۇرماسلىق ئۈچۈن كىتابنىڭ ھەربىر ۋارىقىنى يىرتىپ، كۈندە دەپتەرلىرىمنىڭ ئىچىگە شۇ كۈنلۈك "ۋەزىپەم"نى قىستۇرۋېلىپ سىنىپتا دەرس ئارلىقىدىكى ئون مىنۇت ۋاقىتتىن ئۈنۈملۈك پايدىلىنىپ، ئۆگەندىم. بۇنداق قىلسام، بىر تەرەپتىن ۋاقتىمنى ناھايىتى ياخشى ئورۇنلاشتۇرالايدىكەنمەن، يەنە بىر تەرەپتىن ئۇزاق مۇددەت ئولتۇرۇپ بىرلا ئىشنى قىلىشتىن ھاسىل بولىدىغان زېرىكىش پىسخىكىسىدىن ئۆزۈمنى قاچۇرالايدىكەنمەن. شۇنداق قىلىپ مەن سۆزلۈكلەرنى قىسقىلا ۋاقىت ئىچىدە ئۈنۈملۈك ئۆگۈنۈپ بولدۇم، ھەم ئىمتاھان كۈنىگىچە تەكرارلاپ تۇردۇم.
3. شۇيىلى قىشلىق تەتىلدە، مەن ئۇيغۇر دىيارىغا قايتماي، يېڭى شەرق تىل تەربىيلەش كۇرسىغا قاتناشتىم. مېنىڭ بۇ يەردە قىستۇرۇپ قىلماقچى بولغىنىم بۇ كۇرسقا قاتنىشىش زۆرۆرىيىتى بولۇش-بولماسلىقى. مەن قاتناشقان سىنىپقا دەرس بېرىدىغانلار ھېساپتا جۇڭگو تەۋەسىدىكى يېڭى شەرق كۇرسىنىڭ ئەڭ خىل مالىملىرى بولدى. مېنىڭ ھېس قىلىشىمچە، پۈتكۈل تەربىيلەش جەريان ۋاقتىنى بۆلۈپ كەلسەك مۇنداق بولۇشى مۇمكىن: ئۇلار 50%ۋاقىتتا ئۆزىنىڭ بېشىدىن ئۆتكەنلىرىنى يۇمۇر قىلىپ سۆزلەيدىكەن. 25%ۋاقىتتا قۇرۇق گەپ ساتىدىكەن. قالغان 25%ۋاقىتتا بولسا ھەقىقىي ئەسقاتىدىغان ئۇچۇرلانى سۆزلەيدىكەن. ئەلۋەتتە، مەن دەل مۇشۇ 25%ۋاقىتتا سۆلەنگەن ئۇچۇرلاردىن زور نەپ ئالدىم دېسەم بولىدۇ. بىراق، مېنىڭ شۇ سىنىپتا ئولتۇرۇپ، مۇشۇ ۋاقىتلانى ھېساپلاپ بولغاندىن كىيىن ئەڭ جىق ئويلىغىنىم ئۇيغۇر دىيارىدىكى نامرات، بىراق چەتئەلگە چىقىش ئىستىكى يۇقۇرى ئوقۇغۇچىلار بولدى. پۈتكۈل دەرس جەريانىدا مېنىڭ ئېرىشكىنىم يىغىپ كەلسە بىرنەچچە ۋاراق ئىمتاھانغا تەييارلىق قىلىش ئۇسۇلى، ۋە تاكتىكىلار بولۇپتۇ. مەن شۇ چاغدا، مۇشۇنداق نەرسىلەرنى رەتلەپ، ئۇيغۇر بالىلىرىنىڭ كۆرۈشىگە ماس كېلىدىغان قىلىپ چىقسام، ئۇلار ئاتايىن بىر يېرىممىڭ سوم (ئاڭلىسام ھازىر تېخىمۇ قىممەتلىشىۋېتىپتۇ) پۇل تۆلىمىسىمۇ بولغىدەك، دەپ ئويلىدىم. ئەلۋەتتە، ئاللاھ خالىسا بۇنى چوقۇم ئىشقا ئاشۇرۇش ئۈچۈن تىرىشىمەن.
4. ئاڭلاش ئىقتىدارىمنى مەشىق قىلىشتا مەن ئىزچىل ئىشلەتكەن ئۇسۇل -- ئاڭلاپ يېزىش. چۈنكى مەن باشقا قانداقتۇر كىنو كۆرۈپ مەشىق قىلىش دېگەندەك ئۇسۇللارنى ئەڭ ئۈنۈملۈك دەپ قارىمايتتىم. مەن كونا قەغەز يۈزىدە بېرىدىغان TOEFLنىڭ ئاڭلاش قىسمىنىڭ ھۆججەتلىرىنى توردىن تېپىپ چۈشۈرۈپ، ئۇلارنى بىر جۈملىمۇ بىر جۈملە ئاڭلاپ يېزىپ چىقتىم. ئەلۋەتتە، بۇنىڭ ئىچىدە بىرلا قېتىم ئاڭلاپ يازالمايدىغان جۈملىلەرمۇ ئاز ئەمەس بولۇپ، مەن يەنە تەكرار ئاڭلاپ يازدىم. بۇخىل مەشىق قىلىشنى كۈندە ئاز دېگەندىمۇ قىرىق مىنۇت داۋاملاشتۇرۇپ كەلدىم. دەرۋەقە، مېنىڭ ئاڭلاش ئىقتىدارىم ناھايىتى كۆرۈنەرلىك ئاشقان ئىدى. TOEFL iBTدا، ئاڭلاش قىسمى پۈتۈن ئىمتاھاننىڭ ھەممە بۆلىكىدە بولغاچقا، سىزنىڭ ئاڭلاش ئىقتىدارىڭىز بۇ ئىمتاھاندا يۇقۇرى نومۇر ئېلىش-ئالالماسلىقىڭىزغا ناھايىتى چوڭ تەسىر كۆرسىتىدۇ.
5. ئېغىز تىلى قىسمىنى مەشىق قىلغاندا، مەن يەنىلا ئاڭلاش قىسمىنى مەشىق قىلىشتا ئىشلەتكەن كونا TOEFLنىڭ ئاڭلاش بولىكى ھۆججەتلىرىنى ئۆزۈم ئوقۇپ، كومپيۇتىردا ساقلىۋېلىپ، ئۇنى ئەسلىدىكى ئوقۇلىشى بىلەن سېلىشتۇرۇپ، قايسى يەردە تەلەپپۇزۇمنىڭ توغرا بولمىغانلىقىنى تېپىپ، شۇيەرنى تۈزۈتۈپ ئوقۇش ئارقىلىق تەلەپپۇزۇمنى توختىماي ياخشىلىدىم. ئېغىز تىلى ئادەتتە جۇڭگولۇقلارنىڭ تۆۋەن نومۇر ئالىدىغان قىسمى بولۇپ، نۇرغۇنلىرى دەل مۇشۇ سەۋەپتىن باشقا نەتىجىلىرى ياخشى بولسىمۇ، چەتئەلدىكى مەكتەپلەرنى ئىلتىماس قىلىدىغان رىقابەتتە باشقىلارغا ئۇتتۇرۇپ قويىدۇ، چۈنكى نۇرغۇن مەكتەپلەرنىڭ ئېغىز تىلىغا قويغان نومۇر چېكىگە ئۇلارنىڭ يەتمىكى بەك تەس. بىراق، بىلىشىمچە، ئۇيغۇر بالىلىرى ئېغىز تىلىدا، بولۇپمۇ تەلەپپۇز جەھەتتە مۇتلەق ئۈستۈنلۈككە ئىگە بولىدۇ، بۇ ئەلۋەتتە بىزنىڭ سۆيۈملۈك ئانا تىلىمىزنىڭ بىزگە قىلغان شاپائىتىدىن كەلگەن.
تەلەپپۇز ياخشى بولغانلىق بىلەنلا ئېغىز تىلى قىسمىغا بولغان تەييارلىق تۈگۈمەيدۇ. شۇڭا مەن يەنە سېتىۋالغان كونا TOEFLنىڭ 185پارچە ئۈلگە ماقالىسى بار كىتاپتىن ئۆزۈم ياخشى دەپ قارىغان سۆز ۋە جۈملە شەكىللىرىنى بىرمۇبىر خاتىرلەپ، ئۇلارنى ئېسىمدە تۇتۇۋېلىپ ئېغىز تىل ئىپادىلىشىمدە ئىشلەتتىم. ئۇندىن سىرت، توردىن ئادەتتە ئىمتاھاندا چىقىش مۇمكىنچىلىكى يۇقۇرى تېمىلارنى يىغىپ، ئۆزۈمنىڭ جاۋابىنى يېزىپ يادىلىۋالدىم. شۇنداقلا، ئېغىز تىلى قىسمىنىڭ ھەر بىر بۆلەككە جاۋاپ بېرىدىغان بىر شەخسىي "قېلىپ"نىمۇ تەييارلاپ، شۇلاردىن ئىمتاھان ۋاقتىدا تولۇق پايدىلاندىم.
6. ماقالە قىسمىغا تەييارلىق قىلىشتا مەن ئەڭ كۆپ پايدىلانغىنىم 4-قىسىمدا سۆلەپ ئۆتكەن، كونا TOEFLنىڭ ئۈلگە ماقالە كىتابى بولدى. بۇ كىتاپتا ھەربىرىنىڭ ئۇزۇنلۇقى 300دىن 500گىچە خەتتىن تەركىپ تاپقان جەمئىي 185 پارچە ماقالە بولۇپ، مەن ئۇ ماقالىلانىڭ ھەممىسىنى تولۇق يادىلىۋالدىم. ئىمتاھاندىن كىيىن نەتىجەمگە قارىسام، ماقالە قىسمىدا تولۇق نومۇر ئاپتىمەن. ئەلۋەتتە، ھەممىلا ئادەمنىڭ بۇنداق قىلىشى ئاقىلانىلىك ئەمەس. مېنىڭچە، ئۈلگە ماقالىلىرىنى تېپىپ، ئۇلارنىڭ يېزىلىش ئۇسلۇبى ۋە ئىشلەتكەن جۈملە شەكلىنى تەپسىلىي تەتقىق قىلىپ، ئاندىن ئۆزئالدىغا ماقالە يېزىپ مەشىق قىلسىمۇ يېزىقچىلىق ئىقتىدارى ناھايىتى تېزلىكتە ئاشىدۇ.
7. خاتىرە قالدۇرۇش ئىقتىدارىمنى ئادەتتە دەرس ئاڭلىغاندا مەشىق قىلدۇرۇپ كەلگەن ئىدىم. شۇڭا، ئىمتاھاندىمۇ بۇ جەھەتتە بەك قىينىلىپ كەتمىدىم. چۈنكى ھازىرقى يىڭى ئىمتاھان شەكلىدە نۇرغۇن ئۇچۇرلانى ئاۋۋال ئاڭلاپ، خاتىرە قالدرۇرۇپ، ئاندىن شۇ بويىچە جاۋاب بېرىدىغان بولغاندىكىن، بۇ ئىقتىدارمۇ ئىمتاھاندا بەك مۇھىم رول ئوينايدۇ.
8. ئوقۇش ئىقتىدارىمنى ئادەتتە ئۆزۈمنىڭ كەسپىگە ئائىت كىتاپلارنى جىق ئوقۇغاچقا مەخسۇس ۋاقىت چىقىرىپ مەشىق قىلمىدىم، ھەم بۇنى زۆزۆر دەپ قارىمىدىم.
مەن پۈتۈن TOEFL iBTغا تەييارلىق قىلىش جەريانىدا ئىشلەتكەن ئۇسۇللار مۇشۇ.
TOEFL iBTغا تىزىملىتىش ئويلىغىنىمدىنمۇ تەسكە توختىدى، چۈنكى ئىمتاھان مەيدانىنىڭ سانى چەكلىك، تىزىملىتىدىغانلار كۆپ، يەنە كېلىپ پۈتۈن جەريان توردا ئېلىپ بېرىلىدىغان بولۇپ، ئۇلار توردا ئالدىنئالا ئۇقتۇرۇش چىقىرىپ ماۋۇ ۋاقىتتىن ماۋۇ ۋاقىتقىچە بولغان ئارلىقتىكى ئىمتاھانغا تىزىملىتىش پالانى ۋاقىتتا باشلىنىدۇ، دەيدىكەن. شۇ ۋاقتى كەلگەندە، ئادەمنىڭ جىقلىقىدىن، ئۇلارنىڭ تور بېتىگىمۇ كىرگىلى بولمىغان. ئاران تەستە كىرسە، ئورۇن قالمىغان. مەن دەسلەپتە ئاچچىقتىن بوغۇلۇپلا قالاي دېگەن ئىدىم. پەقەت بولماي، شياڭگاڭغا چىقىپ بېرەي ئەمدى، دەپ تەمشەلسەم، ئىلگىرى ئىمتاھانغا تىزىملاتقان بىرسى ئىمتاھاننى ئەمەلدىن قالدۇرۋېتىپتۇ. مەن پۇرسەتنى تۇتۇپ، ئۇنىڭ ئورنىغا تىزىملاتتىم، ۋە شۇ كۈنى ئىمتاھاننى ئوڭۇشلۇق بېرىپ چىقتىم. مەن بۇ ئىمتاھانغا تىزىملىتىش جەريانىدا مۇھىم دەپ ھېس قىلغان ئىشلار تۆۋەندىكىچە:
1. ئسىمنىڭ ئىنگلىزچە يېزىلىشى. مەن دەسلەپ بۇنىڭغا پىنيىنچە يېزىپ تىسىملاتقان. بىراق كىيىن، مېنىڭ ئىسمىم چەتئەلدىمۇ مۇشۇنداق بولۇپ قالمىسۇن، دەپ، ئۇلارغا فاكس يوللاپ، ئىنگلىزچە ئىسمىنى ULYشەكلىدىكى يېزىلىشقا ئالماشتۇردۇم. دەسلەپ ئىمتاھان مەيدانىغا بارسام، مېنى بۇ سەۋەپتىن كىرگۈزمەي قالارمۇ دەپ ئەندىشە قىلدىم. بىراق ئىمتاھان كۈنى تەكشۈرگۈچىلەر مېنىڭ ئۇيغۇر ئوقۇغۇچى ئىكەنلىكىمنى بىلىپ، ھەيرانلىق بىلەن ئىسمىمغا قاراپ تۇرغاندا، مەن "ئسمىمنىڭ ئىنگلىزچە يېزىلىشى مۇشۇ" دەپلا قويسام، ئۇلار "ھە؟ سىلەرنىڭ ياخشى ئىكەن، بىزنىڭ بالىلار چوقۇم پىنيىنچە يازىدۇ" دەپ كۈلۈپ قويۇپلا مېنى كىرگۈزدى. دېمىسىمۇ ئۇلارنىڭ مېنى كىرگۈزمەسلىككە ھىچقانداق قانۇنىي ئاساسى يوق دەپ ئويلىغان ئىدىم.
2. توردا ئىمتاھانغا تىزىملاتقاندا، ۋاقتىنى تۇتۇپ، دەرھال ئىسمىڭىزدىن باشقا ئالاقىلىشىش ئۇسۇلى دېگەندەك يەرلەرنى تولدۇرماي، كېيىنكى قەدەمنى داۋاملىق بېسىپ، ئىمتاھانغا تىزىملىتىش. چۈنكى بۇ ئۇچۇرلانى سىز ئىمتاھانغا تىزىملىتىپ بولۇپمۇ ئۆزگەرتەلەيسز. شۇڭا ۋاقىت قىس بولغان تىزىملىتىش جەريانىدا ئاران تاپقان ئورۇننى باشقىلارغا ئۇتتۇرۇپ قويماسلىق ئۈچۈن، ئاۋۋال تىزىملتىتىۋېلىپ، ئاندىن باشقا ئۇچۇرلانى ئالدىرماي ئولتۇرۇپ تۈزەتسىڭىزمۇ ئۈلگۈرىسىز.
3. ئىمتاھاندىن بۇرۇن ئامال بار ئىمتاھان مەيدانىنى بىر كۆرۈۋېلىش. مەنغۇ شۇنداق قىلغان، بىراق مەن ئىمتاھان بەرگەن كۈنىسى باشقا بىر نەچچىسى ئىمتاھان مەيدانىغا ھاسىراپ-ھۈمۈدپ كەلگەن ئىدى. ئۇلانىڭ دېيىشىچە مەيداننى بەك تەستە تېپىپتۇ. بىسمىللاسىدىلا بۇنداق بولسا ئىمتاھاننى قانداق بېرەر دەپ ئويلىدىم.
4. ئىمتاھان مەيدانىغا كېرەكلىك كېنىشكىلەرنى تولۇق ئىلىۋېلىش.

مەن بىلىمەن، نۇرغۇن ئۇيغۇر قېرىنداشلىرىمىز بۇ ئىمتاھانغا تەييارلىق قىلىۋاتىدۇ ياكى قىلماقچى. بۇ يەردە مېنىڭ ئەڭ دېمەكچى بولغىنىم، شۇنچە جىق بالىلار ئىنگلىزتىلى ئۆگۈنۈشكە ئاتلىنىدۇ، بىراق تەڭدىن تولىسى مەغلۇپ بولىدۇ، بۇنىڭ سەۋەبى نېمە؟ مېنىڭ ھېس قىلغىنىم، بۇنىڭ ئەڭ چوڭ سەۋەبى ئۇلارنىڭ تىل ئۆگۈنۈشكە تۇتقان پوزىتسىيىسىدە! سىزدە ئەگەر شۇ تىلنى چوقۇم ئۆگۈنۈپ بىر باشقا ئەچىقىدىغان ئىرادە بولسىلا، نۇرغۇن ئىشلىرىڭىز ئوڭغا تارتىدۇ، بولمىسا، سىزمۇ يېرىم يولدا سەپتىن چېكىنىشىڭىز مۇمكىن...

taghoghli

مانا ئېسىل تېمىدىن يەنە بىرى بارلىققا كەپتۇ، مۇشۇ كۈنلەردە بىلىمىنىڭ زاكىتىنى بېرىۋاتقانلار كۆپىيۋاتىدۇ جۇمۇ.
قېنى ئاللاھ خالىسا مەنمۇ بىر ۋاقتىمنى چىقىرىپ ئالغان ئازغىنە ئىلىمىمنىڭ زاكىتىنى بېرىۋالسام بولاتتى.

سىزنىڭ« بىر يىللىق "تەييارلىق" ئوقۇشىنى ئىچكىرىدىكى بىر شەھەردە ئوقۇدۇم» دېگىنىڭزگە ۋە «ئۇيغۇر دىيارىدا تولۇق ئوتتۇرىنى پۈتتۈرگىچە ئوقۇپ» دېگەنلىكىڭىزگە قاراپ سىزنى تەجىربە سىنىپىتا ئوقۇغان دەپ پەرەز قىلدىم. ھەمدە ئالىي مەكتەپكە تىزىملاتقاندا مىنكاۋخەن دەپ تىزىملاتتى دەپ ئويلىدىم. چۈنكى مەنمۇ تاس قالغان شۇنداق قىلىغىلى.

تېخىمۇ ئېسىل تېمىلىرىڭىزنى كۈتۈپ تۇرۋاتىمىز، ئاللاھ ئىلىمىڭىزنى ۋە بىلىمىڭىزنى زىيادە قىلسۇن!

Bidar-Qutlan

تولۇق ئوتتۇرىنى پۈتتۈرۈپ، ئالىي مەكتەپتە ئوقۇمايلا TOEFL ئىمتىھانغا بىرەر، ئىككى يىل تەييارلىق قىلىپ، ئىمتىھان بېرىپ، TOEFL ئىمتىھاندىن ئۆلچەمگە يېتەلىسە، چەتئەلدە بىرەركەسىپتە تولۇق كۇرۇستا ھەقسىز ئوقۇشقا ئىرىشەلەرمۇ؟

chushtash

نەقىل:

ئەسلى يوللىغۇچى: Bidar-Qutlan ، ۋاقتى: 2008-12-6 01:31
تولۇق ئوتتۇرىنى پۈتتۈرۈپ، ئالىي مەكتەپتە ئوقۇمايلا TOEFL ئىمتىھانغا بىرەر، ئىككى يىل تەييارلىق قىلىپ، ئىمتىھ ...

چەتئەلدە تولۇق كۇرسنى ئوقۇشقا بولىدۇ. ئادەتتە، TOEFLدىن لاياقەتلىك بولۇش بىر ئالدىنقى شەرت، چۈنكى سىز بارماقچى بولغان دۆلەت ئەگەر ئىنگلىزتىلىدا دەرس بەرسە، بۇ ئۇيەردە ئوقۇشنىڭ بىر بوسۇغۇسى بولىدۇ. سىز ئەڭ ئاۋۋال شۇ بوسۇغۇدىن ئاتلاپ ئۆتىشىڭىز كېرەك.بىر-ئىككى يىلدا كۆڭۈل قويۇپ ئۆگەنسىلا، پۈتۈنلەي بۇ شەرتكە يېتەلەيدۇ دەپ قارايمەن. مېنىڭ بىلىدىغىنىم، ئادەتتە ئامىرىكىدا تولۇق كۇرس ئوقۇماقچى بولسا TOEFLئارقىلىق تىل ئىقتىدارىنى ئىسپاتلىغاندىن سىرت، يەنە ئامىرىكىنىڭ SAT1ئىمتاھانىنى بېرىش كېرەك. بۇ ئىمتاھان خۇددى جۇڭگونىڭ ئالىي مەكتەپكە كىرىش ئىمتاھانىغا ئوخشاش بولۇپ، پەرقى ئامىرىكىدا مۇقۇم ئالىي مەكتەپ ئىمتاھانى بولمايدۇ، لېكىن كۆپىنچە مەكتەپ SAT1نەتىجىسىنى كىرىش ئۆلچىمى قىلىدۇ. ئەگەر ياۋروپادا ئوقۇماقچى بولسىڭىز، پەقەت TOEFLنەتىجىسى بىلەن سىزنىڭ جۇڭگودىكى ئالىي مەكتەپ نەتىجىڭىزنىلا تەلەپ قىلىدۇ، يەنى ئۇلار جۇڭگونىڭ ئالىي مەكتەپ ئىمتاھان نەتىجىسىنىمۇ بىر مۇھىم ئۆلچەم قىلىدۇ. ياۋروپادا تولۇق كۇرس ئوقىسا ئوقۇش مۇكاپات پۇلى ئېلىش ئامىرىكىغا قارىغاندا كۆپ ئاسان، ھەمدە بەزى دۆلەتلەردە ئوقۇش پۇلى ئېلىنمايدۇ. تۇرمۇش پۇلىنى مەكتەپنىڭ ئوقۇش مۇكاپات پۇلىغا تايىنىپ قامدايدۇ، ياكى ھەپتىدە بەلگىلىك خىزمەت قىلىپ تاپىدۇ. بىراق ئامىرىكىدا بولسا، چەتئەللىك ئوقۇغۇچىلارنىڭ ئوقۇشتىن سىرت خىزمەت ئىزدىشىنى قانۇنسىز دەپ قارايدۇ. بىلمىدىم، جاۋابىم ئەتراپلىق بولدىمىكىن؟

nasin

ئىسىل ،ئېغىز تىلى ۋە يېزىقچىلىققا تەييارلىق قىلىش ئۇسۇلىڭىز بەك ئۆزگىچە ھەم ئۈنۈملۈك بوپتۇ.
ئاخىرىغا تەشنامىز.

Tesewur

قىممەتلىك ۋاقتىڭىزنى چىقارغىنىڭىزغا كۆپ رەھمەت ...
ئۇلۇغ ئاللاھ ئىشلىرىڭىزغا ئۇتۇق ئاتا قىلسۇن .
ياخشى تېمىلىرىڭىز ئۈزۈلۈپ قالمىسۇن...

DELL

نەقىل:

ئەسلى يوللىغۇچى: chushtash ، ۋاقتى: 5-12-2008 22:49
بۇ تېمامدىن سىرت، يەنە GREغا تەييارلىق قىلىش، چەتئەلدە پراكتىكا قىلىش، ئامىرىكىدىكى مەكتەپلەرنى ئىلتىماس قىلىش تەرتىپى، ئامىرىكىدىكى پىرففىسورلار بىلەن ئالدىن ئالاقىلىشىش، Personal Statement يېزىش ئۇسۇلى ۋە دىققەت قىلىشقا تىگىشلىك ئىشلار، Resumeيېزىش ئۇسۇلى قاتارلىق بىر قانچە تېمىلاردا ئۆز تەجرىبەمنى ۋە بۇ تېمىلار توغرىلىق ئويلىغان شەخسىي كۆزقارىشىمنى ئامال بار تەپسىلىي يېزىپ چىقىپ، مۇشۇ يۆنىلىشلەردە ئىلگىرلەش ئۈچۈن ئىزدىنىۋاتقان ئۇيغۇر قېرىنداشلىرىم بىلەن ئورتاقلىشىشقا تىرىشىمەن.

ئېسىل تېما! باشقا تېمىلىرىڭىزنىمۇ ساقلاۋاتىمەن. قاچانراق يوللاش پىلانىڭىز بار؟

ahihuh

بايام تىزىملىتىش تور بىتىگە كىرىپ كۆرۈپ باقتىم . ئىسمى،ئادىرىسى،email قاتارلىق نۇرغۇن تۈردە
يۇلتۇز بەلگىسى بار ئىكەن،يۇلتۇز بەلگىسى بارلارنىڭ ھەممىسىنى تولدۇرامدۇق ياكى،ئىسىمنىلا تولدۇرۇپ
继续 نىلا بىسىپ كىيىنكى قەدەمگە ئۆتەمدۇق.مەن كىرگەن ئادرىس toefl.etest.net.cn

FinalFantasy

ئەجەب قىممەتلىك تەجرىبىلەرنى يوللاپسىز، ئاللاھ قولىڭىزغا دەرت بەرمىگەي.

powerman5000

ئەسسالامۇ ئەلەيكۇم چۈشتاش ئەپەندى . سىزنىڭ TOEFL ئۆگىنىش تەجرىبىلىرىڭىزنى بىزلەر بىلەن بەھرىمەن قىلغانلىڭىز مېنى خۇشال قىلدى .

مەن بۇ يىل 6 - ئايدا كومپيۇتېر كەسپىدە ئالىي مەكتەپنى پۈتتۈرۈپ باكلاۋۇر ئۇنۋانىغا ئېرىشكەن . مەكتەپتە ئوقۇش جەريانىدا نەچچە يىل باشقا شىركەتلەر بىلەن ھەمكارلىشىپ كومپيۇتېردا فىلىم ئىشلەش دېگەندەك ئىشلار بىلەن ئالدىراش بولۇپ ئېنگلىزچىنى ئىچكىرىلەپ ئۆگىنىشكە ۋاقتىم چىقمىغان ئىدى . دەرسلەردىكى ئوتتۇرىچە نەتىجەممۇ تۆۋەن ، ئاران 74 .

مەن ئامېرىكىغا بېرىپ ئوقۇش ئارزۇسىدا ، بېيجىڭدا بىر مەزگىل تىل ئۆگىنەيمىكىن دەۋاتىمەن . سورىماقچى بولغىنىم ( بۇ سوئاللىرىمنى بۈركۈت ئەپەندىمۇ كۆرۈپ قالسا ، مەسلىھەت بېرىپ باققان بولسا ياخشى بولاتتى )

1 . مېنىڭ ئېنگلىزچە سەۋىيەم 4 - دەرىجىدىن بىرئاز تۆۋەن ، يەنى ئىككى ئاي سۆزلۈكنى قاتتىق مەشق قىلسام 4 - دەرىجىدىن ئۆتكىدەك دەرىجىدە . شۇنداق بولغاندا TOEFL ئىمتىھانىدىن يۇقىرىراق نومۇر ئېلىش ئۈچۈن يەنە قانچىلىك ۋاقىت كېتەر ؟ پەرىزىڭىزدە قايسى ۋاقىتتىكى TOEFL ئىمتىھانىغا تەييارلىق قىلىشىم كېرەك ؟

2 . مېنىڭ ئالىي مەكتەپتىكى ئوتتۇرىچە نەتىجەم ئاران 74 ، شۇنداق بولغاندا مەن ئوقۇش مۇكاپاتىغا ئېرىشىشىم ئۈچۈن GRE نىڭ كومپيۇتېر كەسپىي پەنلىرى بويىچە ئالىدىغان ئىمتىھانىغا قاتنىشىشىم لازىممۇ ؟ بۇ ئىمتىھاننى بەرسەم GRE نىڭ GENERAL ئىمتىھانىنى بەرمىسەممۇ بولامدۇ ؟؟

3 . مېنىڭ ئالىي مەكتەپنى پۈتتۈرۈپ بولۇپ TOEFL غا تەييارلىق قىلىش ئۈچۈن كەتكەن بۇ ۋاقىتلىرىم كېيىن ۋىزا ئېلىش ، ۋە ئوقۇش مۇكاپاتىغا ئېرىشىش ئىشلىرىغا تەسىر كۆرسىتەرمۇ ؟